По успешниот настап во регуларниот дел од Супер Лигата, ракометарите на ГРК Охрид, викендов го започнуваат најважниот дел од сезоната. Во рамки на првото коло од плеј-офот, охриѓани гостуваат кај РК Бутел Скопје во салата „Антон Димитров“, во натпревар кој може да го навести правецот на продолжението од шампионатот.
Во таборот на Охрид владее максимална сериозност. Десниот бек на охриѓани, Давид Савревски, го најави мечот и потенцира дека тимот е добро запознаен со противникот, бидејќи неодамна ги одмериле силите, а во плеј-оф фазата секој бод има посебна тежина. Според него, клучот ќе биде цврстата одбрана и трпеливата, паметна игра во нападот.
„Го започнуваме плеј-офот со натпреварот против Бутел во Скопје. Неодамна одигравме натпревар со нив и знаеме што нè очекува. Секој натпревар во плеј-офот значи многу, подготвени сме со цврста одбрана и паметна игра во нападот да стигнеме до нови бодови.“- изјави Савревски.
Јасно е дека Охрид во плеј-офот влегува со амбиција и самодоверба. Почетокот секогаш носи дополнителен притисок, но и можност за силна порака – а охриѓани сакаат токму тоа, старт со победа и чекор поблиску до целта.
