Од овој викенд стартува плеј-аут сегментот каде ќе се разигрува за опстанок во ракометната Суперлига.
Тука една работа е речиси јасна и сигурна, а тоа е дека Радовиш кој без бодови го отвара овој сегмент е прв кандидат за испаѓање, а и со фактот што тимот не донесе значајни засилувања и реши да се потпира на млади ракометари кои немаат искуство, веќе се „предава“ во битката за опстанок.
Битката ќе биде за да се избегне претпоследното место кое води кон баражот за опстанок против второпласираниот тим од Прва лига.
Во плеј-аут сегментот ќе бидат Еурофарм Пелистер 2, Прилеп, Пролет, Куманово, Струга и Радовиш. Екипите на Еурофарм Пелистер 2 и Прилеп имаат квалитет и заслужуваат да бидат дел од плеј-офот, па така да лесно ќе се „прошетаат“ низ плеј-аутот.
Пролет ќе им дава шанса на младите ракометар и без проблем треба да биде сигурен во потврда на опстанокот. Фокус ќе биде на Струга и Куманово во трката за да се избегне претпоследното место.
Ждрепката посакува уште во првото коло на плеј-аутот да има дерби меѓу Куманово и Струга, Радовиш ќе го пречека фаворитот Прилеп, а пак Еурофарм Пелистер 2 ќе биде домаќин на Пролет.
