Возбудувањата во ПМФЛ продолжија со два различни сценарија – реми во Битола и сигурна победа на лидерот во Скопје.
На гостувањето кај Пелистер, екипата на Струга одигра одлично прво полувреме, но на крајот мораше да се задоволи со бод. Стружани наметнаа висок ритам и создадоа повеќе опасни ситуации, особено преку продорите по десната страна и иницијативата на Компаоре и Радески.
По неколку пропуштени можности, водството за гостите дојде по акција во која Воша најпрво беше запрен, но одбиената топка ја претвори во погодок. До паузата Струга можеше и поубедливо да води, но реализацијата изостана.
Во вториот дел Пелистер постепено ја презеде иницијативата, а пресвртот во динамиката дојде по измените кај гостите. По една несигурна реакција и пресечена повратна топка, Лука Булатовиќ ја искористи шансата и израмни. Во финишот Струга имаше можности преку Малески, но голманот Јовчевски беше на висина на задачата и им донесе значаен бод на битолчани.
Во Скопје, лидерот Вардар со минимални 1-0 го совлада Башкими и ја задржа првата позиција на табелата.
„Црвено-црните“ уште од стартот покажаа иницијатива, а иако раниот погодок беше поништен поради офсајд, притисокот продолжи. Решавачкиот момент се случи во самиот финиш на првиот дел, кога Стефан Цветковиќ повторно се запиша во листата на стрелци и донесе предност за домаќинот.
Во второто полувреме Вардар контролираше, создаде уште неколку изгледни шанси, меѓу кои и удар во дирекот, но резултатот остана непроменет. Башкими се закани претежно преку контранапади, но без конкретна реализација.
Со новите три бода, Вардар останува лидер и ја продолжува битката за титулата со стабилна предност на врвот.
