Фудбалската инфраструктура во земјава ќе добие ново освежување откако Фудбалска федерација на Македонија најави конкретна поддршка за домашните клубови преку подобрување на условите на стадионите.
Управниот одбор на ФФМ донесе одлука за набавка на 15.000 до 20.000 нови столчиња за стадионите низ државата. Распределбата на столчињата ќе се врши согласно препораките на Општинските фудбалски сојузи и Управниот одбор на ФФМ, а ќе ги опфати клубовите од Првата, Втората и Третата Македонска фудбалска лига каде што се исполнети условите за нивна монтажа.
Овој проект има за цел да ги унапреди условите за гледачите и да придонесе кон поквалитетно спортско доживување на натпреварите. Монтажата на столчињата ќе биде обврска на клубовите, кои во координација со локалните самоуправи ќе треба да обезбедат соодветна инсталација.
Со вакви чекори, федерацијата продолжува со инвестиции во основната инфраструктура, испраќајќи порака дека покрај резултатите на теренот, важни се и условите во кои се игра и следи фудбалот во Македонија.
