Ракометарите на ГРК Охрид успешно ја одработија обврската во Супер лигата меѓу двата европски предизвици и запишаа сигурна победа над Бутел Скопје со 33-28.
Со новите бодови охриѓани остануваат во ТОП 3 со 35 освоени бодови, задржувајќи го ритамот во згуснатиот распоред кој ги очекува овој период.
Иако без Ѓукиќ и Лиапис, „гладијаторите“ не дозволија изненадување. Бутел подобро го отвори натпреварот и во првите петнаесетина минути диктираше темпо, но клучниот период беше финишот на првото полувреме. Гостите почнаа да грешат, а избраниците на Борис Ројевиќ тоа знаеја да го казнат и на пауза заминаа со солидна предност од 17-11.
Во вториот дел Охрид стигна и до двоцифрена предност, но гостите не се предадоа и успеаја да ја намалат разликата. Сепак, победата ниту во еден момент не беше доведена во прашање.
По натпреварот, левиот бек на охриѓани- Стефан Петриќ, во изјава за Спортска Мрежа, истакна дека заморот и кратката подготовка се почувствувале во воведот, но тимот на време го пронашол својот ритам.
,, Имавме малку време за да се подготвиме за овој натпревар, игравме меч од ЕХФ Купот, распоредот беше згуснат. Првите петнаесет минути беше малку тешко, поради техничките проблеми со преносот влеговме и малку незагреани, но потоа влеговме во нашиот ритам и го приведовме мечот до крај. “
Исто така, Петриќ се осврна и на реваншот викендов против Дукла Прага во рамките на европските обврски, потенцирајќи дека и покрај високата предност, тимот нема право на опуштање.
,, Иако е девет разлика, не смееме да се опуштиме, одиме таму секако- да победиме, што повеќе можеме. После тоа веднаш нè чека Тинекс Пролет во Скопје..се надевам на продолжување на победничкиот ритам и на реваншот со Дукла, и во Скопје. “- изјави Петриќ.
Охрид продолжува во победнички ритам, балансирајќи меѓу домашната сцена и европските предизвици. Следува жешко гостување во Прага, но пораката од соблекувалната е јасна – фокус, дисциплина и уште една победа како цел. „Гладијаторите“ очигледно не планираат тука да застанат.
