Второлигашот Беласица претстави уште две нови засилувања за пролетната полусезона. Нови имиња во таборот на струмичани се Мите Цикарски и Мартин Шаренкоски.
Цикарски доаѓа од Вардар. Триесет и тригодишниот фудбалер ги покрива крилните позиции и носи големо искуство. Во својата кариера настапуваше за Македонија ЃП, Работнички и Брера Струмица, а беше дел и од У-19 тимот на Партизан (Србија).
Меѓународна кариера градеше настапувајќи во Грција за Етникос и ПАС Јанина, во Романија за Газ Метан, како и во Бугарија за Ботев Пловдив.
Мартин Шаренкоски има 19 години, игра на позицијата среден играч за врска и доаѓа од радовишки Детонит Плачковица, а потекнува од школата на Брера Струмица.
Струмичани пролетниот дел од сезоната го отвораат на домашен терен против Охрид.
