Силекс денес покрај Охридското Езеро ќе се соочи со Струга Трим Лум, каде и двете екипи ќе целат кон прва победа во пролетниот дел, откако Силекс ремизираше со Башкими, а пак Струга загуби на дербито во Тетово со Шкендија.
За тимот од Кратово овој меч е последна шанса за да фати приклучок кон првите три места, а токму и дефанзивецот Ѓорге Џеков вели дека се надеваат дека во Кратово ќе се вратат со бодови.
„Одиме во Струга да се надигруваме, имаме добри играчи и мотивацијата е на високо ниво. Во првото коло не успеавме да запишеме триумф и покрај добрата игра. Бевме подобри од противникот, имавме доста шанси, но едноставно топката не сакаше во голот. Направивме и некои грешки кои ќе ги исправиме пред мечот со Струга ТЛ. Нема да не залаже фактот што противникот во првото коло загуби, затоа што мислам дека е една од подобрите тимови во Првата лига и ќе биде еден добар натпревар, вистинска битка за првите три места. Се надеваме дека ќе се вратиме со бодовите во Кратово“, рече Ѓорге Џеков, дефанзивецот на Силекс.
