Европската ракометна федерација повторно им укажа доверба на македонските арбитри Димитар Митревски и Благојче Тодоровски, кои ќе бидат дел од еден од најпривлечните натпревари во Лигата на шампионите. Нашата судиска двојка е назначена да ја дели правдата на дуелот меѓу ПИК Сегед и Барселона во рамките на Б групата.
Натпреварот ќе се одигра на 18 февруари во Унгарија, како дел од 11. коло во елитното натпреварување. Во пресрет на ова соочување, Сегед се наоѓа на четвртата позиција на табелата, додека каталонскиот гигант Барселона е второпласиран.
По успешниот настап на нивното прво сениорско Европско првенство, Митревски и Тодоровски продолжуваат со настапи на највисоката клупска сцена. Тие веќе неколку години се дел од елитната група судии на ЕХФ и редовно судат средби од Лигата на шампионите, Европската лига, како и од големите репрезентативни турнири.
Ова ново делегирање претставува дополнителна потврда за нивниот квалитет и за континуираното присуство на македонските судии во врвот на европскиот ракомет.
