Искусниот Хусеин Демири кариерата ќе ја продолжи во Еуромилк ГЛ, кој добива сериозно засилување во битката за повисок ранг. Искусниот фудбалер пристигнува како слободен играч по разделбата со Брегалница.
Демири остави силен печат во дресот на Башкими, каде беше еден од клучните играчи во историскиот успех и пласманот на кумановскиот клуб во Првата македонска лига.
Формата што ја прикажуваше минатата сезона, но и во претходните години, јасно покажува дека станува збор за фудбалер кој и понатаму може да прави разлика на теренот.
Со неговото доаѓање, Еуромилк ГЛ значително го крева квалитетот на тимот, токму во момент кога е тоа најпотребно. Поранешниот прволигаш моментално е непоразен лидер во Третата лига – Север и има јасна цел – пласман во Втората лига.
Првото место на табелата носи бараж за повисок ранг, а Демири треба да биде еден од носителите на играта во клучниот дел од сезоната.
29-годишниот фудбалер зад себе има богато искуство. Во Косово настапуваше за Феризај, Дуќагини и Призрен, на меѓународна сцена играше и во Финска за Кеми, додека во македонскиот фудбал ги носеше дресовите на Работнички, Македонија ЃП, Шкупи, Влазрими, Тетекс, Брегалница, Башкимк и Охрид.
Ангажманот на Демири е јасна порака дека Еуромилк ГЛ не крие амбиции и сериозно атакува на потврда на лидерската позиција и чекор поблиску до враќање во повисок ранг на натпреварување.
