Возбудливо коло зад нас во Првата македонска кошаркарска лига, со одиграни повеќе натпревари кои дополнително ја искомплицираа битката за врвот и за пласман во ТОП 8 фазата, особено во групата „Б“.
Во дербито на групата „Б“, Бутел стигна до значајна гостинска победа против Струмица ФМП со 83:71. Гостите одиграа одлично прво полувреме и стекнаа солидна предност (48:36), која домаќините не успеаја целосно да ја анулираат. Иако Струмица ФМП се доближи во третиот период, Бутел рутински го затвори натпреварот. Киров беше лидер кај победниците со 24 поени, пред Јанески (18), Мартиноски (12) и Андоновски (11), додека кај домашните Александровски постигна 23, а Д. Пандев 21 поен.
Овче Поле ја оправда фаворитската улога против Струмица Ролинг и славеше со 82:67. Тимот од Свети Николе имаше контрола врз резултатот во текот на целиот меч и во последната четвртина ја потврди четвртата победа сезонава. Каришик реализираше 22 поени, Николовски 17, а Здравковиќ 15. Кај Струмица Ролинг, Атанасов беше најефикасен со 16 поени.
Вардар оствари убедлив триумф над Младинец со 109:62, без поголеми проблеми против последнопласираниот тим. Петмина кошаркари на „црвено-црните“ имаа двоцифрен учинок, предводени од Стојановски со 20 поени. Кај Младинец, Здравковски реализираше 22 поени.
Тетекс ТТК приреди изненадување совладувајќи го Охрид со 70:66. Клучна беше третата четвртина која тетовци ја добија со 22:15 и ја претворија во четврта сезонска победа. Крстевски беше прво име кај победниците со 24 поени, додека кај Охрид се истакна Димитровски со 26.
Во уште еден важен натпревар од групата „Б“, Борец баскет убедливо го совлада Спортисимо во Кавадарци со 90:67 и се вклучи во трката за највисок пласман. Со овој успех, велешани се израмнија по учинок со Бутел, Соколи 1933 и Струмица ФМП, што најавува драматична завршница. Трпески постигна 16 поени за Борец баскет, додека кај Спортисимо Митрев реализираше 19.
Во групата „А“, Црн Дрим беше подобар од Водно Санс и славеше со 85:73, победа која им ги одржува шансите за пласман меѓу најдобрите четири. Камиловски со 22 и Д. Шабани со 20 поени беа клучни кај стружани, додека Стојанов со 27 поени се истакна кај гостите.
Со овие резултати, Првата кошаркарска лига влегува во завршница од регуларниот дел со максимална неизвесност, каде секој следен натпревар може да има клучно значење за конечниот пласман. Веќе овој викенд односно денес и утре се играат натпреварите од последното коло од регуларниот дел.
