Тренерот Мартин Алаѓозовски од ФК Академија Пандев Брера Струмица е избран за најдобар тренер во младинска категорија на синоќешното 63-то издание на традиционалната манифестација на која се избраа најдобрите спортисти, тренери и спортски екипи за 2025 година, за што веќе објави Спортска Мрежа.
Ова признание е претставува потврда за неговата посветена и континуирана работа со младите фудбалери. По добиеното признание испрати благодарност за поддршката и довербата, што за него се силен мотив за во иднина.
„Сакам да упатам искрена благодарност до ФК АП Брера, Сојузот на училишен спорт и Општина Струмица за укажаното признание. Оваа поддршка и доверба претставуваат силен мотив за понатамошна посветеност и развој на младите спортисти“, рече Алаѓозовски.
Младиот стратег сега го води првиот тим на Брера Струмица во Првата македонска фудбалска лига и зад себе има солидни резултати во есенскиот дел. Тимот ја темпира формата во Грција за продолжението од шампионатот.
Признанието за младинска категорија и довербата со сениорскиот тим се јасен сигнал дека клубот во Алаѓозовски гледа тренер со визија и капацитет за долгорочен развој.
