Македонскиот одбојкарски репрезентативец Владо Милев повторно ќе настапува во странство. Искусниот одбојкар на паузата во првенството ја прекина соработката со актуелниот шампион Струмица 47&72, каде што воедно ја извршуваше и функцијата претседател на клубот, а кариерата ќе ја продолжи во унгарскиот тим Казинбарчика.
Унгарскиот клуб е добро позната средина за Милев, кој претходно настапуваше таму во периодот од 2017 до 2019 година. Во тие две сезони со Казинбарчика освои две шампионски титули и еден трофеј во Купот.
Милев и Казинбарчика се договорија за соработка до крајот на сезоната, а трансферот ќе му овозможи да остане во врвна натпреварувачка форма во пресрет на настапите со репрезентацијата. Македонската селекција оваа година ја очекуваат предизвици во Европската лига 2026, како и учеството на Европското првенство кое ќе се одржи во септември во Софија.
Со овој ангажман, Владо Милев ќе биде вториот македонски интернационалец во Унгарија, откако претходно Александар Љафтов се пресели во МАВ Елоре.
