Македонскиот прволигаш Вардар продолжува со амбициозните планови за новата сезона во ПМФЛ. Тимот ја засили својата екипа со двајца нови фудбалери – Дарко Велковски е старо нов фудбалер, и 28-годишниот крилен играч Стефан Цветковиќ.
Дарко Велковски се враќа во македонскиот фудбал по богата меѓународна кариера. Претходно настапувал за Работнички и Вардар, а потоа го носеше дресот на Ријека, Ал Етифах, Динамо Букурешт и Ниреѓихаза, и последно играше за Зрињски. Искусниот дефанзивец ќе донесе стабилност и лидерство на теренот, како и интернационално искуство кое ќе биде од голема важност за младите играчи во тимот.
Покрај него, во редовите на Вардар се приклучи и 28-годишниот Стефан Цветковиќ, крилен фудбалер со динамичен стил на игра. Неговата брзина и креативност ќе дадат дополнителна сила на нападот на тимот, а навивачите може да очекуваат возбудливи моменти на крилните позиции.
Цветковиќ има играно за Чукарички, Графичар Белград, Црвена Звезда, Металец, Раднички Ниш, и Железничар Панчево.
Вардар не застанува тука – раководството најавува уште едно или две засилувања пред стартот на сезоната. Со овие играчи, тимот има јасна цел: да атакува на шампионската титула во ПМФЛ и да се врати на врвот на македонскиот фудбал.
Од управата истакнуваат дека засилувањата не се само за подобрување на квалитетот на теренот, туку и за креирање на конкуренција во тимот, што ќе придонесе за поголема енергија и мотив на секој натпревар. Навивачите на Вардар со нетрпение го очекуваат почетокот на сезоната, надевајќи се на нови победи и спектакуларни моменти.
