Фудбалскиот клуб Брегалница доби финансиска „инјекција“ од општина Штип во висина од 15 милиони денари. Предлог точката која се најде на денешната седница на Советот на општина Штип беше изгласана и потврдена.
„Врз основа на член 46 и член 21 став 1 точка 25 од статутот на општина Штип, бараме Советот на општина Штип да донесе одлука за одобрување на финансиски средства за финансирање на фудбалскиот клуб Брегалница во износ од 15 милиони денари. Со оглед на тоа што општина Штип е единствен акционер во акционерското друштво Брегалница 2008 Штип, бараме Советот да ги одобри овие средства за да може фудбалскиот клуб нормално и непречено да функционира“, рече Вишна Шорова Ангелова, секретар на Општина Штип.
Брегалница во пролетниот дел ќе се бори за враќање во Првата лига, а за таа цел тимот кој заврши на третото место во есенскиот дел со три бодови помалку од лидерот Охрид се засили со Бојан Рајков кој е повратник од Силекс, Јорданчо Наумоски од Пелистер и со младиот Костадин Капсаров кој доаѓа од Беласица.
