Женскиот ракометен клуб Брод го официјализираше ангажманот на Петра Јершек, 25-годишна ракометарка со богато домашно и меѓународно искуство, која треба да претставува значајно засилување за тимот во продолжението од сезоната.
Јершек е родена на 24 септември 2000 година, а со ракомет започнала уште на седумгодишна возраст во редовите на ЖРК Осиек. Во матичниот клуб поминала дури 15 години, од кои седум сезони настапувала во Првата лига на Хрватска. Во тој период ги минала сите младински селекции на хрватската репрезентација, потврдувајќи го својот потенцијал уште од најрана возраст.
Интернационалната кариера ја започна во 2022 година со трансфер во Шпанија, каде две сезони го носеше дресот на ЦБ Сан Хосе Обреро. Летото 2024 година се пресели во Македонија и стана дел од шампионскиот состав на ЖРК Ѓорче Петров, клуб кој четири години по ред ја освојуваше титулата државен првак. Со „лавиците“ настапуваше во Европската лига, а сезоната ја заврши со освоениот Куп и шампионската титула.
На крајот од сезоната, Јершек се приклучи на ЖРК Металург Автокоманда, со кого настапуваше во ЕХФ Купот, продолжувајќи да го гради своето меѓународно искуство.
Со својата борбеност, искуство и настапи на европска сцена, Петра Јершек доаѓа како сериозно засилување за амбициозниот состав на ЖРК Брод.
Со заминувањето на Јершек од Металург Автокоманда продолжува егзодусот од македонскиот суперлигаш, кој од ден во ден губи ракометарки.
