Ракометарите на Вардар на крајот од јануари ги очекува сериозен меѓународен предизвик, откако „црвено-црните“ ќе настапат на четвртото издание на реномираниот „Labin Handball Cup 2026“, кој ќе се одржи во хрватскиот град Лабин на 30 и 31 јануари.
На турнирот ќе учествуваат силни екипи од регионот, а Вардар своето учество ќе го започне со полуфинален дуел против словенечкиот тим Слован Љубљана. Овој натпревар е закажан за 30 јануари со почеток во 18 часот. Во второто полуфинале, истиот ден од 20:15 часот, ќе се сретнат хрватските претставници Загреб и Сесвете.
Победниците од полуфиналните пресметки ќе се борат за трофејот во големото финале на 31 јануари од 20:15 часот, додека поразените екипи ќе одиграат натпревар за третото место истиот ден од 18 часот.
За Вардар, овој турнир претставува одлична можност за проверка на формата и тактичките замисли против квалитетни противници од Словенија и Хрватска, но и шанса стручниот штаб да им даде поголема минутажа на сите ракометари пред продолжението на сезоната во домашното првенство и настапите во Европа.
„Црвено-црните“ ќе отпатуваат во Хрватска речиси во комплетен состав, а единствено ќе отсуствува Николас Боно, кој доби слободно до 1 февруари по настапите за репрезентацијата на Аргентина.
