Ракометната репрезентација на Данска продолжи со одличните настапи на Европското првенство, откако во дербито од групата ја совлада Германија со 31:26 и практично си обезбеди пласман меѓу најдобрите четири селекции на континентот.
Иако Германија подобро го отвори натпреварот и на стартот имаше водство, Данците брзо воспоставија контрола, предводени од расположениот Матијас Гидсел. Првото полувреме донесе израмнета борба и минимална предност за домаќинот (13:12).
Клучниот момент се случи во вториот дел, кога Данска одигра серија од неколку минути на исклучително високо ниво. Со цврста одбрана, брзи голови и фантастичен голман Емил Нилсен, кој запиша двоцифрен број одбрани, Данците направија серија која ги одлепи на недостижна разлика (23:16).
Гидсел и Питлик беа најефикасни кај победникот со по осум погодоци, додека кај Германија се истакна Ушчинс, но „панцирите“ не успеаја да најдат решение за данскиот ритам во вториот дел.
Со оваа победа, Данска се израмни со Германија на врвот со по шест бодови, но благодарение на подобрите меѓусебни дуели, веќе е сигурен полуфиналист. Во последното коло, Германија и Франција ќе решаваат во директен дуел кој ќе го освои второто место што води меѓу најдобрите четири на Европското првенство.
