Женскиот ракометен клуб Чаир официјално ги промовираше двете засилувања за вториот дел од сезоната во женската Суперлига, со кои јасно ги најави високите амбиции – освојување на шампионската титула.
Ново име во редовите на скопскиот тим е македонската репрезентативка Александра Коловска, која пристигнува од Металург Автокоманда. Коловска настапува на позицијата пикер и важеше за еден од клучните столбови во играта на поранешниот клуб, особено во одбраната. Таа зад себе има богато искуство, настапи за Металург и Вардар, како и интернационална епизода во словачката Јувента Михаловце, а со своето доаѓање ќе донесе дополнителна сигурност и конкуренција во ростерот на Чаир.
Покрај Коловска, нов член на екипата е и аргентинската ракометарка Елизабет Ван Акере, која ќе ја зголеми ширината и квалитетот на тимот во клучниот дел од сезоната. Од клубот очекуваат нејзиното искуство и енергија брзо да се вклопат во системот на игра.
Чаир го заврши есенскиот дел на третата позиција со 22 бодови, само еден помалку од водечките Ѓорче Петров и Металург Автокоманда, кои имаат по 23. Со оглед на големите кадровски промени во редовите на Металург Автокоманда, патот за борба за титулата е широко отворен, а Чаир со овие две засилувања се вклучува сериозно во трката за шампионскиот пехар, кој моментално го брани Ѓорче Петров.
