Кошаркарскиот клуб МКК Куманово официјално ја доби организацијата на финалниот турнир од националниот Куп „Благоја Георгиевски-Буштур“ во машка конкуренција за натпреварувачката сезона 2025/2026.
Раководството на кумановскиот клуб пројави интерес за организација на завршницата од најмасовното клупско натпреварување, ги исполни сите услови од јавниот повик и ќе биде домаќин на осумте најдобри екипи во државата.
Финалниот турнир ќе се одржи во Куманово во периодот од 13 до 15 февруари, а учество ќе земат екипите на ТФТ, МЗТ Скопје Аеродром, Кожув, Пелистер, Маџари, Работнички, Феникс 2010 и домаќинот МКК Куманово.
Натпреварите ќе се играат во спортската сала во Куманово, а програмата започнува со четвртфиналните средби на 13 февруари, во кои ќе се сретнат:
-
ТФТ – Феникс 2010
-
МЗТ Скопје Аеродром – Работнички
-
Кожув – Маџари
-
Пелистер – МКК Куманово
Победниците од овие дуели ќе обезбедат пласман во полуфиналето, кое е закажано за 14 февруари, додека името на новиот освојувач на Куп-пехарот ќе биде познато по одигрувањето на големото финале на 15 февруари.
