Женскиот кошаркарски клуб Баскет Кам од Македонска Каменица официјално ја доби организацијата на финалниот турнир од Купот „Благоја Георгиевски-Буштур“ во женска конкуренција за натпреварувачката сезона 2025/2026.
Раководството на актуелниот шампион пројави интерес за организација на националниот Куп, ги исполни сите услови предвидени со јавниот повик и ќе биде домаќин на завршницата од најмасовното клупско натпреварување.
Финалниот турнир ќе се одржи во Македонска Каменица на 21 и 22 февруари, а учество ќе земат четирите најдобри екипи во женска конкуренција: Крива Паланка, Бадел 1862, МЗТ Бела Вода и домаќинот Баскет Кам.
Натпреварите ќе се играат во салата „Кирил и Методиј“, а полуфиналните средби се закажани за 21 февруари (сабота). Во нив ќе се сретнат екипите на Баскет Кам и МЗТ Бела Вода, односно Крива Паланка и Бадел 1862.
Победниците од двете полуфинални средби ќе обезбедат пласман во големото финале, кое ќе се одигра на 22 февруари, кога ќе биде познат и новиот освојувач на Куп-пехарот.
