Кошаркарската „МТЕЛ“ Супер лига донесе возбудлива вечер со две комплетирани средби и еден прекинат натпревар од 12. коло.
Актуелниот шампион МЗТ Скопје Аеродром рутински ги одработи „домашните задачи“ на гостувањето кај Маџари, славејќи со 87:76. Иако домашните ја добија првата четвртина (24:22), „металците“ целосно ја презедоа контролата во втората, кога со цврста одбрана дозволија само 11 поени. На полувреме МЗТ имаше солидни 47:35, а до крајот без поголеми проблеми ја зачува предноста. Марин Петков одигра одличен меч со 26 поени, шест скока и пет асистенции, додека поддршка доби од Меккејден (13), Танасковиќ (11), Стојановски и Гил (по 10). Кај Маџари се истакна Амар Хот со 15 поени и 14 скока.
Во Битола, Пелистер и Работнички одиграа неизвесен и борбен натпревар, во кој „зелено-белите“ стигнаа до победа од 88:85. Домашните имаа постојана, но минимална предност низ целиот меч, а клучниот момент се случи на нешто повеќе од минута до крајот, кога Никола Малешевиќ погоди тројка за 87:83. Дејвис беше најефикасен кај Пелистер со 25 поени, додека Малешевиќ додаде 21. Кај Работнички сите стартери беа двоцифрени, а Лука Петровски се истакна со 19 поени.
Натпреварот меѓу МКК Куманово и Чаир 2030 беше прекинат по помалку од две минути игра, при резултат 2:0 за домашните. Поради лизгава подлога и нерегуларни услови, судиите одлучија средбата да се доигра утре, со преостанати 08:18 минути од првата четвртина.
