Со одигрувањето на последните два натпревари беше комплетирано 12. коло од Првата македонска лига, во кое прилепската екипа на Мега баскет стигна до исклучително важна победа и се искачи на првото место во групата „А“.
Кошаркарите на Мега баскет одиграа зрел и сигурен натпревар на гостувањето во Охрид, каде славеа со убедливи 81:64. Прилепчани имаа целосна контрола врз играта и резултатот во текот на сите четири четвртини, а клучна улога одигра фантастичниот Враниќ, кој реализираше дури 35 поени и беше нерешлива енигма за домашната одбрана. Одлична поддршка доби од Јовановски со 14 и Димитриевски со 12 поени, што беше доволно за деветтата сезонска победа и скор од 9-2, со кој Мега баскет ја презеде лидерската позиција на табелата. Кај Охрид, Донаковски постигна 14 поени, додека Бојоски и Кузмановски додадоа по десет.
Во вториот натпревар од вечерта, екипата на Струмица Ролинг стигна до својот втор триумф сезонава, откако на домашен терен убедливо го совлада Спортисимо со 91:59. Освен во вториот период, кога играта беше најизедначена, струмичани целосно доминираа и рутински ја запишаа победата. Абрашев беше најефикасен со 20 поени, Атанасов реализираше 19, додека значаен придонес дадоа и Димовски со 16 и Мицев со 14 поени. Во редовите на Спортисимо се истакна Митрев со 15 поени, но тоа не беше доволно за избегнување на нов пораз.
По ова коло, Мега баскет е лидер во групата „А“, додека во групата „Б“ Струмица ФМП останува на врвот, а екипите на Спортисимо и Младинец и натаму се без победа во шампионатот.
