Второлигашите ги одработуваат зимските подготовки за пролетниот дел од сезоната, во кој не очекуваат исклучително интересни борби – и за опстанок, и за пласман во Првата лига.
Веќе е јасно дека дел од екипите ќе водат жестока битка за спас, но постои и група на таканаречени „прежалени“ второлигаши кои се соочуваат со речиси невозможна мисија и многу веројатно ги пакуваат куферите за враќање во Третата лига. Сепак, во пролетниот дел тие би можеле да им создадат проблеми на ривалите кои се борат за опстанок и да влијаат врз конечните математички пресметки.
Речиси без реални шанси за опстанок се екипите на Големо Коњари, Слога Виница и Преспа. Бодовната разлика е преголема за да се очекува некакво чудо, дури и преку баражот.
Големо Коњари е на минус 14 бодови од бараж-зоната и дури на минус 21 од местата кои носат директен опстанок, што го прави експресното враќање во Третата лига речиси извесно.
Слична е ситуацијата и со Слога Виница, која заостанува десет бодови зад бараж-позицијата (12. место), односно 17 бодови зад зоната за директен опстанок – негатива која е тешко достижна.
Преспа од Ресен презимува на 14. позиција со девет бодови, осум помалку од бараж-зоната и дури 15 помалку од осмото место, кое обезбедува сигурен опстанок.
Заедничко за овие три екипи е тоа што се нови второлигаши и многу е веројатно дека нивниот настап во Втора лига ќе биде само епизоден.
Главната битка за опстанок ќе се води меѓу Победа и Вардар Неготино, кои ќе се обидат да стигнат барем до бараж. Прилепчани имаат шест бодови негатива од бараж-зоната и 13 од директниот опстанок, додека тимот од Неготино е со бод подобар во оваа трка.
Во моментов, Тетекс и Каменица Саса со по 17 бодови се наоѓаат во бараж-зоната – седум бодови под линијата за директен опстанок, но и пет бодови над зоната за директно испаѓање во Трета лига.
Оттука, јасно е дека групата на „отпишани“ ја сочинуваат Големо Коњари, Слога Виница и Преспа, додека вистинската трка за спас – директно или преку бараж – ќе ја водат Победа, Вардар Неготино, Тетекс, Каменица Саса и Кожуф. Екипите со подобар пласман, пак, ќе се обидат што побрзо да го потврдат опстанокот и да си обезбедат мирна завршница на сезоната.
- ЦЕЛА ТАБЕЛА ОД ВТОРА ЛИГА:
| Поз. | Клуб | ОН | Поб | Н | Пор | ПОС | ПРИ | ГР | БОД |
|---|---|---|---|---|---|---|---|---|---|
| 1 | ГФК Охрид Лихнидос | 15 | 11 | 3 | 1 | 38 | 10 | +28 | 36 |
| 2 | ЗФК Шкендија Арачиново 77 | 15 | 11 | 2 | 2 | 25 | 9 | +16 | 35 |
| 3 | ФК Брегалница 2008 АД | 15 | 10 | 3 | 2 | 31 | 9 | +22 | 33 |
| 4 | ФК Беласица АД | 15 | 10 | 1 | 4 | 33 | 14 | +19 | 31 |
| 5 | ФК Скопје АД | 15 | 9 | 2 | 4 | 32 | 16 | +16 | 29 |
| 6 | ЗФК Новaци 2005 | 15 | 8 | 3 | 4 | 25 | 11 | +14 | 27 |
| 7 | ФК Детонит Плачковица | 15 | 7 | 5 | 3 | 21 | 10 | +11 | 26 |
| 8 | ГФК Осогово | 15 | 7 | 3 | 5 | 23 | 13 | +10 | 24 |
| 9 | ФК Кожуф Гевгелија | 15 | 5 | 7 | 3 | 18 | 10 | +8 | 22 |
| 10 | ФК Каменица Саса | 15 | 4 | 5 | 6 | 32 | 30 | +2 | 17 |
| 11 | ФК Тетекс 1953 | 15 | 5 | 2 | 8 | 26 | 28 | -2 | 17 |
| 12 | ГФК Вардар Неготино | 15 | 3 | 3 | 9 | 21 | 46 | -25 | 12 |
| 13 | ФК Победа АД | 15 | 3 | 2 | 10 | 12 | 37 | -25 | 11 |
| 14 | ФК Преспа | 15 | 3 | 0 | 12 | 16 | 37 | -21 | 9 |
| 15 | ФК Слога 1934 | 15 | 2 | 1 | 12 | 15 | 34 | -19 | 7 |
| 16 | ФК Големо Коњари | 15 | 1 | 0 | 14 | 8 | 62 | -54 | 3 |
