Второлигашот Скопје вечерва договори големо засилување во своите редови за пролетниот дел каде „пиратите“ ќе целат кон влез во Првата лига.
Ново име кое доаѓа во второлигашот од Автокоманда е искусниот Симеон Христов, кој пристига од прволигашот Македонија ЃП.
Тимот на Александар Таневски е значително се засилува со пристигањето на Христов, а 33-годишниот играч зад себе има успешна кариера настапувајќи покрај за „лавовите“ од Ѓорче и за Пелистер, Гостивар, Вардар, Работнички, Тиквеш, Борец, Еуромилк ГЛ, Тетекс, Брегалница од Штип, додека пак во странство беше дел од Влазнија во Албанија, унгарските екипи Егри и Вашаш, а настапуваше и за Мјанмар.
Огромно е искуството на Христов, тој низ кариерата помогнал многу екипи да стигнат до повисок ранг на натпреварување, да стигнат до посакуваните цели, а сега ќе атакува со Скопје за влез во Прва лига.
Враќањето на Христов во Автокоманда буди спомени, а клубот сподели фотографија истакнувајќи дека некои приказни не завршуваат.
„Некои приказни не завршуваат… тие само чекаат вистински момент, 20 години подоцна – враќање дома“, велат од ФК Скопје.
Претходно, Скопје се засили со младиот талент Бесмир Даци и искусниот голман Кристијан Наумовски.
„Пиратите“ презимуваат на петтото место со 29 бодови, а пролетниот дел го отвараат со гостување во Виница кај Слога.
