Ракометната репрезентација на Шведска направи голем чекор кон пласман меѓу најдобрите четири на Европското првенство, откако во Малме ја совлада селекцијата на Словенија со 35-31, во меч од првото коло на главната фаза во групата 2.
Словенците одиграа многу квалитетно прво полувреме и долго време го диктираа темпото на играта. Предводени од одличниот Домен Макуц и со сигурниот Јоже Базник на голот, избраниците на Урош Зорман во неколку наврати имаа и три гола предност, а на паузата заминаа со водство од 15-13.
Сепак, во продолжението целосно се смени сликата на теренот. Шведска ја засили одбраната, ги „заклучи“ приодите кон својот гол и го презеде целосниот контролен пакет. Клучен беше периодот на стартот од второто полувреме, кога Словенија остана без погодок речиси шест минути, што домаќинот го искористи за серија и пресврт во резултатот.
Откако еднаш ја презедоа предноста, „трите круни“ не ја испуштија до крајот. Иако Словенија во финишот успеа да се доближи на само гол негатива, Швеѓаните со повеќе смиреност и широка ротација ја затворија средбата и стигнаа до заслужена победа.
Лукас Сандел со седум погодоци беше најефикасен во победничкиот состав, додека кај Словенија најрасположен беше Домен Макуц со осум гола. Со овој триумф, Шведска изби на врвот на групата и со бод од следниот натпревар практично ќе го завери билетот за полуфиналето, додека Словенија ќе мора да бара шанса за продолжување на сонот во преостанатите дуели.
