27-годишниот Никола Пејовиќ и официјално е ново засилување на ФК Работнички, со што скопскиот клуб добива искусен и разновиден дефанзивец во пресрет на продолжението од сезоната.
Пејовиќ е фудбалер кој се одликува со сигурност и дисциплина во играта, а неговата најголема предност е можноста да одговори на повеќе позиции во одбраната. Примарно настапува како стопер, но подеднакво квалитетно може да биде и решение на десната бековска позиција, што му дава дополнителна тактичка флексибилност на стручниот штаб на Работнички.
Неговиот последен ангажман беше во редовите на Борац Бања Лука, додека зад себе има богата интернационална кариера. Пејовиќ има настапувано во Словенија за Рудар Велење, во Хрватска за Локомотива Загреб и Рудеш, во Србија за Пролетер и Земун, како и во Италија каде беше дел од Емполи и Пистоезе.
Со вакво искуство стекнато во различни фудбалски средини, Никола Пејовиќ се очекува да донесе стабилност, цврстина и лидерство во одбраната на Работнички, а неговото доаѓање претставува јасна амбиција на клубот за подобри резултати во продолжението од шампионатот.
