Осмата рунда од Трета лига – Југозапад го донесе изненадување, откако Светлост во Кукуречани за првпат сезонава се израдува на триумф и бодови совладувајќи го Влазними од Струга со 3:2.
Џиновска победа за Светлост и тоа преку пресврт, откако гостинскиот тим преку голгетерот Насер Доко на полувреме имаше 0:2. Во вториот дел Никола Шеровски постигна два гол за 2:2, а во 64. минута Стефан Бучински направи комплетен пресврт за конечни 3:2.
Поранешниот второлигаш Кораби со 3:1 го совлада тимот на Света Троица од Охрид на Градскиот стадион во Дебар. Домашниот тим преку Колоња, Амбари и Леши имаше 3:0, а Маркоски во 80. минута погоди за конечни 3:1.
Демир Хисар запиша нов пораз откако дома загуби од Кравари со 1:2. Гостинскиот тим по само 17 минути игра имаше двојна предност со головите на Емини и Јовановски, а во вториот дел Јанкуловски постигна гол за конечни 1:2.
Лидерот Преспа запиша уште една убедлива победа и продолжува да гази, откако денес на Градскиот стадион во Ресен со 3:0 го збриша новиот третолигаш Славеј од Мешеишта.
Дејан Груевски и искусниот Никола Пластиновски погодија за 2:0 во првиот дел, а во второто полувреме Ергин Дафто ги постави конечните 3:0.
Ланскиот второлигаш Караорман со голот на Никола Димов славеше минимална победа од 1:0 над Евротип.
Како што инфорамираше Спортска Мрежа вчера Сатеска во Волино со 7:3 ја декласираше Велешта. Целиот извештај од тој меч прочитајте го овде.
