Фудбалскиот клуб Шкендија го дозна својот ривал во плеј-оф фазата од УЕФА Конференциската лига, откако денеска во Нион, во седиштето на Европската фудбалска федерација, беше одржана ждрепката за нокаут-рунда.
Тетовскиот клуб, според полудиригираниот систем на ждрепка, имаше две можни опции за противник – Лех Познањ од Полска или Самсунспор од Турција, а на крајот ждрепката одлучи „црвено-црните“ да се соочат со турскиот претставник Самсунспор.
Првиот натпревар од овој двомеч ќе се одигра на 19 февруари во Скопје, каде Шкендија ќе биде домаќин, додека реваншот е закажан за 26 февруари во Турција. Како неносител во оваа фаза, македонскиот претставник најпрво ќе игра пред својата публика, а потоа ќе гостува на тешкиот терен кај Самсунспор.
Овој пласман претставува историски момент за Шкендија и за македонскиот фудбал во целина, бидејќи клубот од Тетово стана првиот македонски тим кој обезбедил настап во плеј-оф фаза од едно европско натпреварување. Успешниот настап во Европа значително го зголеми меѓународниот рејтинг и коефициентот на клубот, а воедно придонесе и за подобрување на позицијата на македонскиот фудбал на УЕФА ранг-листата.
Доколку Шкендија успее да ја мине пречката наречена Самсунспор, во осминафиналето од Конференциската лига ја очекува уште еден силен предизвик, дуел против Рајо Ваљекано или Шахтјор.
Шкендија продолжува да испишува златни страници во својата европска историја, со јасна цел – уште еден голем чекор напред на сцената на УЕФА Конференциската лига.
