Македонија пред голем предизвик: Данска на стартот од ЕП, историјата и прогнозите не се на наша страна

Македонската ракометна репрезентација вечерва (20:30 часот) во Хернинг ќе го отвори настапот на Европското првенство со дуел против актуелниот светски и олимписки шампион Данска. „Црвено-жолтите“ влегуваат во уште еден голем шампионат со јасна желба за докажување, иако бројките, историјата и прогнозите не одат во нивна полза.

Македонија и Данска досега одиграле осум меѓусебни натпревари на големи турнири и квалификации, а само еднаш нашата селекција излегла како победник. Тој триумф се случи во Скопје во 2021 година, во квалификациите за Европското првенство, и тоа на дебито на Кирил Лазаров како селектор, кога Македонија славеше со 33-29. Од друга страна, најболниот пораз останува оној од ЕП 2012 во Белград, кога Данска победи со 33-32, во меч кој многумина и денес го паметат како една од најголемите пропуштени шанси во нашата репрезентативна историја.

Сите останати дуели завршија во корист на Данска, што јасно зборува за квалитетот и континуитетот на скандинавската ракометна сила. Сепак, македонската репрезентација и во минатото знаела да ги помести границите, па иако победа на данско тло би била вистинска сензација, таа не се смета за невозможна мисија.

Дополнителен притисок носат и прогнозите на експертите. Според анализите на Европската ракометна федерација, Македонија има само 8,9% шанси за пласман во втората фаза од шампионатот, додека за четвртфинале речиси и да не ѝ се даваат изгледи. Само неколку селекции имаат пониски проценти, а Данска и Франција се означени како главни фаворити за златниот медал. Според форматот на натпреварување, само двете најдобри селекции од секоја група ќе продолжат понатаму, додека останатите ќе го завршат настапот по групната фаза.

И покрај тоа, поддршката нема да изостане. Неколку стотици македонски навивачи ќе бидат присутни во „Јиске Банк Боксен“ арената, каде салата ќе биде исполнета до последно место. „Фалангата“ планира организирано собирање во фан-зоната уште два часа пред почетокот на натпреварот, со цел да даде силен ветар во грб на избраниците на Лазаров.

Овој натпревар воедно е и почеток на деветтиот настап на Македонија на Европските првенства, приказна што започна уште во 1998 година во Италија, мина низ историското петто место во Србија во 2012, падовите и подемите во следните изданија, па сè до обидот за нов чекор напред на шампионатот кој се одржува во Данска, Шведска и Норвешка.

Историјата, статистиката и прогнозите се на страната на Данска, но ракометот честопати знае да пишува поинакви приказни. Македонија ќе излезе на терен со верба, карактер и поддршка од трибините – а токму таму често почнувале најголемите изненадувања.

Натпреварот меѓу Данска и Македонија се игра вечерва од 20:30 часот.