30-годишниот македонски голман Дејан Илиев ја продолжува кариерата во нова средина и официјално потпиша договор со Рапид. До трансферот дојде поради нарушените односи што ги имаше во досегашниот клуб УТА Арад со тренерот Адријан Михалча, поради што Илиев беше приморан да побара нов предизвик во кариерата.
Илиев веќе е претставен како нов чувар на мрежата на Рапид, каде што се очекува со своето искуство и квалитет да донесе сигурност во одбраната и да се избори за значајна улога во тимот. Македонскиот интернационалец зад себе има богато искуство од настапи во неколку европски шампионати, што претставува дополнителна вредност за неговиот нов клуб.
Во текот на својата кариера, Илиев има настапувано за повеќе клубови низ Европа. Кариерата ја започна во Арсенал, каде беше дел од лондонскиот гигант, по што следуваа неколку позајмици – најпрвин во словачки Серед, потоа во полската Јагјелонија и англискиот Шрузбери.
Подоцна, Илиев го носеше дресот на словачки Тренчин, по што се пресели во Финска каде бранеше за Хелсинки. Следен клуб беше ФК Сараево, каде што помина една полусезона, оставајќи солиден впечаток меѓу стативите. И беше дел од УТА Арад.
