Македонските прволигаши Шкендија и Струга Трим Лум со позитивни настапи ги отворија пријателските натпревари во рамки на зимските подготовки, забележувајќи убедливи победи против Брера Струмица, односно Малиќи.
Шкендија денеска го одигра првиот контролен натпревар во 2026 година и славеше сигурна победа од 3:0 против АП Брера на терените на тренинг-комплексот на ФФМ во Скопје. И покрај заморот од интензивната фаза на подготовки и зголемените физички напори, избраниците на тренерот Јетон Беќири покажаа дисциплина и доминација во текот на целиот натпревар. Стручниот штаб им даде можност за настап на сите фудбалери кои беа на располагање, додека Трумчи имаше физички проблем, а Алхасан и Вебстер се приклучија со задоцнување на подготовките.
„Црвено-црните“ поведоа во 12. минута, кога Адеми одзеде топка пред противничкиот шеснаесетник и асистираше до Мазари, кој прецизно реализираше за 1:0. Во второто полувреме следеше целосна контрола на играта, а во 61. минута Ибраими го зголеми водството, откако Ндзенгве ја погоди пречката по убавата асистенција на Тамба. Конечните 3:0 беа поставени во 82. минута, кога Ибраими со мирна завршница го постигна својот втор погодок на натпреварот.
Позитивниот тест за Шкендија доаѓа пред заминувањето на екипата на главната фаза од подготовките. По слободниот петок, тимот во сабота патува во Анталија, Турција, каде што до 1 февруари ќе се подготвува за пролетниот дел од сезоната.
Успешен старт на контролите имаше и Струга Трим Лум, која попладнево во Корча забележа убедлива победа од 0:3 на гостувањето кај албанскиот Малиќи. Стрелци за тимот на Бледи Шкемби беа Малески, Рочи и Радески. Според прикажаното и создадените шанси, стружани имаа можност и за поубедлив триумф, но за прв натпревар од зимските подготовки, резултатот е повеќе од задоволителен.
И Струга Трим Лум, како и Шкендија, ќе ја одработи главната фаза од подготовките во Анталија, Турција, додека Брера Струмица, по контролата со тетовскиот тим, ќе се подготвува во Грција.
Двата пријателски натпревари најавија сериозен пристап и добра форма кај водечките екипи во пресрет на продолжението од сезоната.
