ФК Струга Трим Лум официјално потврди дека четворица фудбалери на клубот ќе настапуваат како позајмени во други екипи и во пролетниот дел од сезоната. Станува збор за Јусуф Каба, Хадис Таири, Веби Ислами и Кире Ристевски.
Клубот продолжува со стратегијата за развој на своите играчи преку позајмици во домашните натпреварувања. Така, по веќе договорените позајмици на Кире Ристевски, Јусуф Каба и Веби Ислами од стартот на сезоната, на листата дополнително е додаден и левиот бек Хадис Таири.
Таири во наредните шест месеци ќе го носи дресот на Шкендија од Арачиново, каде што ќе настапува заедно со Јусуф Каба. Веби Ислами, пак, ќе продолжи да игра за Кожуф, клуб во кој имаше одлични настапи во есенскиот дел од Втората лига.
Дефанзивецот Кире Ристевски е отстапен на позајмица во Пелистер. Во првата полусезона Ристевски настапуваше како позајмен фудбалер во Македонија Ѓорче Петров, а до крајот на сезоната ќе игра за клубот од неговиот роден град. Воедно, ова ќе бидат и последните шест месеци од неговиот договор со Струга Трим Лум.
Од клубот информираат дека Веби Ислами, Јусуф Каба и Хадис Таири по завршувањето на сезоната се очекува да се вратат во Струга, со цел подготвени и поискусни да се стават на располагање на стручниот штаб во наредната натпреварувачка година.
