Македонскиот ракометен клуб Алкалоид испиша уште една значајна страница во својата историја, откако статистиката пред почетокот на Европското првенство 2026 покажа дека токму овој клуб ќе има најмногу свои играчи на континенталниот шампионат во Скандинавија.
Вкупно 14 ракометари кои настапуваат за Алкалоид ќе бидат дел од репрезентациите на ЕП, со што македонскиот суперлигаш се најде пред европските гиганти Магдебург, кој испраќа 13 играчи, и Фуксе Берлин со 12 претставници. Веднаш зад нив се Барселона и Гумерсбах, кои ќе бидат застапени со по 11 ракометари, додека Алборг, ПИК Сегед, Кил и Динамо Букурешт ќе имаат по десет свои играчи на шампионатот.
Силното присуство на македонските клубови се потврдува и преку Еурофарм Пелистер, кој ќе има девет ракометари на Европското првенство, како и Вардар 1961 со петмина учесници.
Овој податок е уште една потврда за квалитетната работа во Алкалоид и растечкиот углед на македонскиот ракомет на европската сцена, особено во пресрет на едно од најголемите натпреварувања на континентот.
