Македонскиот репрезентативен дефанзивец Дарко Велковски повеќе не е член на Зрињски Мостар, откако клубот од Босна и Херцеговина официјално објави прекин на соработката.
Велковски пристигна во Зрињски во летниот преоден рок како едно од позначајните засилувања, но не успеа да се избори за посериозна улога во тимот. Во есенскиот дел од сезоната настапи на само два официјални натпревари, по што стана јасно дека нема да биде во прв план кај стручниот штаб.
По заемна согласност, двете страни решија да ја прекинат соработката порано од планираното. Од клубот истакнаа дека разделбата е коректна и професионална, при што му посакаа среќа и успех на Велковски во продолжението од кариерата.
Со оваа одлука, 29-годишниот стопер ќе мора да побара нова средина за вториот дел од сезоната. Во својата досегашна кариера Велковски настапуваше за Македонија Ѓорче Петров, Работнички и Вардар, а интернационалната кариера ја градеше преку Ријека, Ал Етифак (Саудиска Арабија), Динамо Букурешт и Ниреѓихаза.
Зрињски, пак, продолжува со подготовките за пролетниот дел од сезоната, каде што клубот има амбиции и на домашната сцена и во европските настапи.
