ЖРК Атлетик продолжува со јасна визија и стабилност во ростерот, откако клубот официјално го продолжи договорот со левиот бек Анастасија Величковска до 2029 година.
Величковска е родена на 27 април 2005 година и важи за една од најперспективните ракометарки во својот генерациски круг. Ракометната кариера ја започна во РК Илинден Вардар, каде што помина пет години, по што следеше едногодишен ангажман во ЖРК Металург Автокоманда. Во 2024 година беше дел од младинската репрезентација на Македонија која настапи на Светското првенство за ракометарки до 20 години, одржано во нашата земја.
Во актуелната сезона таа го носи дресот на Атлетик, а со константните и зрели настапи во првиот дел од првенството го оправда добиената доверба. Левиот бек во есенскиот дел постигна вкупно 28 погодоци и даде значаен придонес во резултатите на тимот, што беше клучно двете страни да се договорат за продолжување на соработката.
ЖРК Атлетик моментално е непоразен лидер во Првата женска ракометна лига со максимален учинок – 11 победи од исто толку натпревари и 22 освоени бодови. Клубот јасно ја најавува својата амбиција за пласман во Суперлигата, а задржувањето на млади и квалитетни ракометарки како Величковска е дел од стратегијата за остварување на таа цел.
