Македонската ракометна репрезентација со победа ја заокружи подготвителната фаза пред Европското првенство, откако во последниот контролен натпревар убедливо славеше над данскиот Мидтјиланд со 36-27. Добрата игра и сериозниот пристап во текот на целиот подготвителен период даваат оптимизам пред настапите во групата Б.
По натпреварот, свои импресии изнесе десното крило Ненад Костески, кој потенцира дека селекцијата е подготвена за предизвиците што ја очекуваат на континенталниот собир.
„Ова беше последен контролен натпревар пред настапот на Европското првенство. Мислам дека успеавме се да опфатиме и да се подготвиме добро за сите натпревари кои ни престојат на Европското првенство во групната фаза. Мислам дека сме доволно спремни и трениравме добро, иако беше малку тешко бидејќи се насобраа доста контролни натпревари, но одигравме добро до самиот крај на овој натпревар. Направивме добра разлика и мислам дека максимално подготвени за оваа што ни претстои на Европското првенство. Станува збор за сериозна група да не трошиме зборови знаеме за какви репрезентации станува збор, тука е Данска, Португалија која на претходното Светско првенство заврши на четвртото место, Романија која не смее никако да се потцени, таа е во нагорна линија. Мислам дека ќе ги дочекаме сите тие натпревари спремни, ќе одиграме најдобро што знаеме, ќе го дадеме нашето најдобро и се надевам на позитивни на сите тие три натпревари и дека ќе ја израдуваме цела Македонија, зошто да не верувам и во пласман во следната фаза!“, рече десното крило Ненад Костески.
Македонија настапот на Европското првенство го започнува против домаќинот Данска, додека на 18 јануари следи дуелот со Португалија, а групната фаза ќе биде затворена на 20 јануари со натпреварот против Романија. Националниот тим во добро расположение и со зголемена самодоверба го чека стартот на шампионатот.
