Македонската машка ракометна репрезентација со убедлива победа ја заокружи серијата контролни натпревари пред настапот на Европското првенство. Избраниците на Кирил Лазаров славеа против данскиот прволигаш Митјиланд со 35-27 и со позитивна енергија го чекаат стартот на шампионатот.
Натпреварот започна рамноправно, со почетна предност за Македонија, по што следеше изедначена игра и минимално водство од 14-13 на полувремето. Клучниот исчекор дојде во вториот дел, кога националниот тим го крена ритамот, ја зацврсти одбраната и постепено ја зголемуваше разликата до конечни осум голови плус.
Лазаров ротираше и им даде шанса на сите расположливи ракометари, а индивидуално се истакна Филип Кузмановски со шест погодоци. Значаен придонес имаа и Митев и Серафимов со по пет гола, додека Костески четири пати се запиша во листата на стрелци.
Со оваа победа, Македонија ги затвори подготовките во кои претходно беше поразена од Хрватска, ремизираше со Швајцарија и ги совлада Бахреин и Украина. Формата и атмосферата во тимот даваат оптимизам пред официјалните натпревари.
Македонија ќе настапи во групата Б на Европското првенство, а сите натпревари ќе ги игра во Хернинг. Отворањето е закажано за петок против домаќинот Данска во 20:30 часот, на 18 јануари следи дуел со Португалија, а групната фаза ќе биде заокружена на 20 јануари со натпреварот против Романија.
