Најдобрата македонска тенисерка со победа ги започна квалификациите за Австралија опен. Во првото коло таа ја совлада четвртата носителка, Синја Краус од Австрија, со 2-0 во сетови (7:5, 6:0) за само 62 минути игра. Во следната рунда Ѓорческа ќе се соочи со Тамара Зиданшек од Словенија, која со идентични 2-0 ја елиминираше Французинката Џесика Понше.
Дуелот меѓу Ѓорческа и Краус започна израмнето, со неизвесна борба во првите гемови. Првиот брејк го направи австриската тенисерка, која поведе со 4:2. Сепак, во деветтиот гем македонската претставничка спаси две сет-топки, намали на 5:4 и потоа целосно го презеде ритамот на мечот, освојувајќи ги следните три гема и препуштајќи ѝ на противничката само два поена.
Во вториот сет Ѓорческа ја продолжи доминацијата и со серија од вкупно девет освоени гема по ред стигна до убедливи 6:0, со што без загубен гем го завери пласманот во следното квалификациско коло.
