Претседателот на Одбојкарската федерација на Македонија (ОФМ), Петар Јовановски, заедно со потпретседателот Хабил Ајети и генералниот секретар Филип Деспотовски, викендов присуствуваа на свечената прослава во Тирана, по повод 80-годишнината од основањето на Албанската одбојкарска федерација.
Двете федерации негуваат одлична соработка и стабилно партнерство низ годините, што уште еднаш беше потврдено на свечената гала-вечер. Во таа пригода, ОФМ му подари на претседателот на Албанската одбојкарска федерација, Ерлинд Плумб, плакета со ликот на Мајка Тереза.
Јовановски, Ајети и Деспотовски беа дел од елитата на европското одбојкарско семејство, заедно со претседателот на Европската одбојкарска конфедерација (ЦЕВ), Роко Сикириќ, како и извршниот директор на ЦЕВ, Вук Карановиќ, кои заеднички го одбележаа значајниот јубилеј на Албанската федерација.
