Македонскиот ракометен шампион Еурофарм Пелистер и официјално го реши тренерското прашање за вториот дел од сезоната, откако довербата му ја додели на добро познато име во битолскиот и македонскиот ракомет – Стевче Алушовски.
По оставката на Рубен Гарабаја на почетокот од декември и периодот во кој тимот беше воден од спортскиот директор Звонко Шундовски, раководството на „зелено-белите“ се одлучи за домашен стратег, кој веќе има длабока поврзаност со клубот и градот. Алушовски со тоа се враќа во Битола и повторно ќе седне на една од најодговорните клупи во македонскиот спорт.
Искуството, познавањето на средината и претходните резултати беа клучни фактори во изборот, особено ако се земе предвид фактот дека Пелистер го очекува интензивен период со борба за домашните трофеи и продолжение на настапите во Лигата на шампионите.
Од клубот официјално ја потврдија одлуката преку соопштение.
„Нашиот нов почеток во 2026 година е поврзан со добро познато име. Стевче Алушoвски е нов тренер на Еурофарм Пелистер и ќе ја води нашата екипа до крајот на оваа сезона. 53-годишниот тренер по неколку години се враќа во својот матичен клуб, во улога на тренер на шампионот на Македонија. Алушoвски во два наврати водеше клуб од Битола – Пелистер и Еурофарм Работник, а сега го презема тимот на Еурофарм Пелистер. Нашиот прославен репрезентативец тренерската, како и играчката кариера, ја започна во Битола. Во мак-ракометот ги водеше Вардар 1961 и Охрид, а кратко работеше и во Исланд. Прозивката на новиот тренер е закажана за в среда (14 јануари) во 17:00 часот.“
Алушовски зад себе има шампионска титула со Вардар 1961 и големи резултати со Пелистер, Еурофарм Работник и Охрид, па во Битола очекуваат неговото враќање да донесе стабилност, јасна визија и продолжување на шампионските амбиции на клубот.
