Второлигашот Осогово од Кочани на 17 јануари ќе ги „запали моторите“ откако шефот на стручниот штаб Крсте Крстев со првата прозивка ќе означи старт на зимските подготовки.
„Жетварите“ веќе имаат закажано неколку пријателски натпревари преку кои ќе се „бруси“ формата за пролетниот предизвици каде тимот ќе цели кон директен опстанок во Втората лига.
Осогово презимува на осмото место на табелата со 24 бодови и целта ќе биде сезоната да заврши во зоната од осмата позиција па нагоре на табелата, тоа е зоната која гарантира директен опстанок во ВМФЛ.
Како што веќе ексклузивно објави Спортска Мрежа, Филип Димоски е првото засилување на Осогово, а се очекува тимот од Кочани да го претстави новото засилување во следните денови.
Од клубот засега замина само најдобриот стрелец Владимир Жоглев, кој е нов играч на Шкендија Арачиново, а како што дознава Спортска Мрежа раководството веќе интензивно води преговори за уште некое засилување. Пролетниот дел Осогово го отвара со лутиот ривал Каменица Саса во дерби на Истокот кое ќе се одигра во Кочани.
