Прволигашот Шкупи официјално ги започна зимските подготовки, откако клубот од Чаир најави дека во недела стартува ново поглавје во тековната сезона. Првиот тренинг ќе се одржи на стадионот во Чаир со почеток од 13:00 часот и ќе биде отворен за навивачите, како порака дека клубот сака заедно со публиката да го започне патот кон подобри резултати.
Од Шкупи потенцираат дека следи период на сериозна работа, со акцент на поголема транспарентност, посветеност и постепено подобрување на состојбата во клубот. Раководството верува дека со напорна работа, чесен пристап и поддршка од навивачите може да се изгради посветла иднина за тимот.
Зимските подготовки доаѓаат во тежок период за Шкупи, кој презимува на дното од табелата со само еден освоен бод. Клубот во досегашниот тек од сезоната веќе промени двајца тренери – започна со турскиот стратег Умит Шахин, потоа беше ангажиран Минас Османи, кој поднесе оставка, па така чаирчани во продолжението од сезоната ќе бидат предводени од трет тренер.
Во Шкупи се надеваат дека зимскиот период ќе донесе стабилизација и позитивен пресврт, а почетокот на подготовките симболично го отвораат заедно со своите навивачи.
