ОФИЦИЈАЛНО: Шкендија го продаде Клисман Цаке во Ахмат Грозни

Еден од најстандардните и најважни фудбалери на Шкендија во изминатите сезони, Клисман Цаке, ја заврши својата епизода во Тетово и кариерата ќе ја продолжи во Русија. Албанскиот дефанзивец официјално е нов член на прволигашот Ахмат Грозни, кој ја активираше откупната клаузула во договорот и на тој начин стави крај на четиригодишната соработка со македонскиот шампион.

Од тетовскиот клуб информираат дека трансферот е реализиран со целосна почит кон желбата на играчот да направи следен чекор во кариерата и да се испроба во нова меѓународна средина, а воедно Шкендија обезбедила и финансиско обесштетување, што го прави договорот поволен за двете страни.

Цаке пристигна во Шкендија во јануари 2022 година и во наредните четири години и пет нецелосни сезони беше нераздвоен дел од „црвено-црните“. Во тој период освои шампионска титула и одигра вкупно 133 официјални натпревари – 106 во првенството, три во Купот и 24 на европската сцена, при што постигна 12 погодоци, бројка која е особено значајна ако се знае дека станува збор за дефанзивец.

Посебно место во неговата тетовска приказна има историскиот успех на клубот – пласманот во групната фаза од Конференциската лига на УЕФА, каде што Цаке беше еден од клучните играчи. Интересен е и фактот што минатото лето, по освојувањето на титулата, тој имаше можност да си замине како слободен фудбалер, но одлучи да го продолжи договорот и да му помогне на клубот во европската авантура, а сега заминува оставајќи и конкретен бенефит за Шкендија.

Од клубот му се заблагодарија за професионализмот, посветеноста и придонесот во изминатите години, потенцирајќи дека Клисман Цаке засекогаш ќе остане дел од златната генерација на Шкендија, и му посакаа многу успех во новиот предизвик со Ахмат Грозни.