Европската ракометна федерација (ЕХФ) донесе одлука да ја повлече номинацијата на македонските судии Славе Николов и Ѓорѓи Начевски за машкото Европско првенство 2026, кое ќе се одржи од 15 јануари до 1 февруари во Данска, Шведска и Норвешка. Со оваа одлука, Македонија од првично планираните два судиски пара, ќе биде претставена само со Димитар Митревски и Благојче Тодоровски.
Причината за ваквиот потег на ЕХФ е сомнеж за манипулација на видео-снимките од задолжителниот „Мултистејџ фитнес тест“, кој е дел од стандардната процедура за подготовка на судиите за големите натпреварувања, се наведува во соопштението на ЕХФ. По анализите спроведени од официјалниот фитнес-партнер Fitgood Pro и интегритетниот партнер Sportradar, утврдено е дека постои висок степен на веројатност дека доставените видеа не биле автентични.
ЕХФ најави дека случајот ќе биде предмет на понатамошна истрага и дека го задржува правото да покрене и правни постапки. И покрај оваа одлука, од Европската куќа на ракометот информираат дека функционирањето на судискиот систем на ЕП 2026 нема да биде нарушено и дека ќе настапат вкупно 17 судиски пара.
