Македонија забележа пресврт-победа над Украина во второто коло од „Жолтиот Куп“, по влегувањето на Иван Галевски на голот на стартот од второто полувреме.
Младиот чувар на мрежата го предводеше тимот со одлична серија од одбрани која резултираше со клучен триумф.
„Имавме осцилации во играта, но тоа е нормално во ваков турнирски систем на натпревари. Ова ќе ни помогне многу, бидејќи истото нè очекува и на Европското првенство. Ова е добра увертира за што подобро да се подготвиме, да ги анализираме нашите недостатоци и оваа победа ни значи многу за самодовербата која ни е потребна пред мечот со Швајцарија.”- изјави Галевски.
Исто така, тој потенцираше дека и покрај осцилациите во играта, неговиот настап и настапот на тимот биле клучни за пресвртот и победата, и дека ваквите турнирски натпревари се важна подготовка за Европското првенство.
,, Секогаш може подобро, задоволен сум од својот настап, јас сум тука за да ја искористам секоја шанса што ќе ми биде пружена. Мора да потенцирам и дека голема заслуга за тоа имаат и соиграчите кои што одлично затвораа во одбраната во вториот дел и ми дадоа ветар во грб за да можеме заедно да ја оствариме оваа победа“- додаде младиот чувар на мрежата.
Следниот натпревар на Македонија ќе биде против домаќинот на турнирот, Швајцарија, во последното коло од „Жолтиот Куп“.
