Фудбалерите на Брера Струмица денеска и официјално ги започнаа подготовките за пролетниот дел од шампионатот, со што стартува процесот на темпирање на формата за продолжението на сезоната во Првата лига.
Подготовките се планирани да се реализираат во три фази. Првата ќе се одвива во Струмица, каде тимот ќе работи на физичка подготвеност и основни тактички елементи, додека главната фаза е закажана во Грција во периодот од 20 до 31 јануари. Завршниот дел од подготовките повторно ќе се реализира на домашен терен.
Како што Спортска Мрежа претходно објави, младиот стратег Мартин Алаѓозовски уште пред неколку дена го најави почетокот на подготовките и првиот собир на екипата, а денеска тренажниот процес и официјално започна. Во меѓувреме, јасно е дека ќе има и одредени промени во ростерот, откако клубот се раздели со Фахд Нзенгуе кој веќе е промовиран како нов играч на тетовска Шкендија, Фодеј Травали, Хаџи Драме и Мануел Куестас, кој настапуваше како позајмен фудбалер од Вардар.
Според информациите на Спортска Мрежа, раководството на струмичкиот прволигаш води интензивни преговори за нови засилувања. Фокусот е ставен на ангажман на фудбалери на позициите десно крило, напаѓач, како и двајца играчи од средниот ред, кои во следниот период би требало да бидат официјално промовирани.
Во рамки на подготовките ќе бидат одиграни и неколку контролни натпревари. Првиот пријателски тест е закажан за 15 јануари против Шкендија, додека на 7 февруари Брера ќе се соочи со второлигашот Детонит Плачковица, а ќе следуваат и дополнителни проверки за време на главната фаза од подготовките во Грција.
Брера Струмица ја заврши есенската полусезона на седмото место со 19 освоени бодови, а во пролетниот дел под водство на Алаѓозовски ќе се бори да го потврди директниот опстанок и да ја задржи стабилноста во фудбалската елита на Македонија.
