Пред почетокот на зимските подготовки второлигашот Брегалница од Штип се раздели со Дарко Алексовски – Пеле, кој во продолжението од сезоната нема да го носи дресот на „сините“, дознава ексклузивно Спортска Мрежа.
Разделбата според нашите информации се случила пред околу еден час, кога бил информиран дека клубот повеќе нема да смета на неговите услуги, а фудбалерот бил изненаден за ваквата разделба која доаѓа неочекувано, а како што ни открива популарниот Пеле и без причина, но Алексовски ја почитува секоја одлука и пријателски се разделува со Брегалница.
Искусниот фудбалер кој има богата кариера и каде што секогаш го носел тимскиот и капитенскиот дух сега е слободен и кариерата ќе ја продолжи во нова средина.
Алексовски по цели 17 години се врати во Брегалница, а неговото враќање беше поздравено од штипската фудбалска јавност, кога пристигна летото во 2025 година од редовите на Каменица Саса.
Низ својата кариера покрај за Саса, има настапувано и за Вардар Неготино, Детонит Плачковица, Осогово, Силекс, Кит Го од Пехчево, Баби како и за тимот на Модрича од Босна и Херцеговина.
Заминувањето на Алексовски од Брегалница веќе ги активира екипите околу неговиот потпис во обид да ги обезбедат неговите услуги, а во следниот период ќе биде познато каде популарниот Пеле ќе ја продолжи кариерата.
