Актуелниот македонски шампион, Шкендија, денес ги започна зимските подготовки за пролетната полусезона, во кој Шкендија ќе се натпреварува на три фронта – домашното првенство, Купот и за првпат во својата историја со предизвици и во европската пролет, по пласманот во плеј-офот на УЕФА Конференциската лига.
Првите денови се наменети за медицински прегледи, по што екипата ќе премине со работа со по две тренинг-сесии дневно. Еден контролен натпревар е планиран за 15 јануари, а од 17 јануари до 1 февруари Шкендија ќе ја реализира главната фаза од подготовките во Анталија, Турција.
За време на престојот во Анталија, покрај физичката и техничко-тактичката подготовка, планирани се и четири контролни натпревари, кои ќе му послужат на стручниот штаб за тестирање на формата на екипата.
Шкендија презимува на третото место на табелата во македонскиот шампионат со 36 бодови. Пролетната полусезона е планирано да започне на 11 февруари, кога во Тетово, Шкендија ќе се соочи со Струга Трим Лум.
