Иако имаше важечки договор до јуни, грузискиот репрезентативец- Теимураз Орјоникидзе, повеќе нема да биде дел од составот на Охрид во продолжението од сезоната.
Поради повредата што ја заработи на репрезентативен настап минатиот мај, левиот бек не успеа да се врати целосно во натпреварувачки ритам и нема да може да му биде на располагање на тренерот Борис Ројевиќ.
Во консултација со клубот, беше донесена одлука двете страни спогодбено да се разделат и Орјоникидзе да ја продолжи кариерата во средина каде што би можел да добие поголема минутажа.
Дополнителен фактор во оваа одлука е и фактот што Охрид располага со вкупно 11 странски ракометари, а за плеј-офот право на настап ќе имаат само деветмина.
Орјоникидзе пристигна во Охрид пред две сезони од финскиот Рихимаки Кокс и остави силен впечаток со своите одлични партии до моментот на повредата. Иако клубот сметаше на него на подолг рок, сепак околностите наметнаа спогодбена разделба.
