Европската ракометна федерација направи корекција на листата на арбитри за претстојното Европско првенство што ќе се одржи во Данска, Шведска и Норвешка.
Имено, поради пријавена повреда, чешкиот судиски пар Вацлав Хорачек и Јири Новотни отпадна од листата на арбитри, а нивното место го презедоа Србите- Марко Боричиќ и Дејан Марковиќ.
Овој шампионат ќе има историско значење за македонскиот ракомет, бидејќи за првпат две судиски двојки од Македонија ќе делат правда на едно Европско првенство.
Дебитантски настап на големо сениорско натпреварување ќе имаат судискиот пар- Димитар Митревски и Благојче Тодоровски од Битола, додека веќе етаблираниот пар Славе Николов – Ѓорѓи Начевски повторно е дел од елитната листа.
Во конкуренција се вкупно 18 судиски двојки од цела Европа, а само две земји имаат по два пара — Македонија и Шпанија, со што се нагласува континуитетот и кредибилитетот на македонските арбитри на меѓународната сцена.
Европското првенство 2026 ќе се игра од 15 Јануари до 1 Февруари во Хернинг, Осло, Малме и Кристијанштад.
